जलस्तर बढेपछि कोसीमा रातो बत्ती बालियो

श्रावण ११, २०७३- कोसी नदीको जलस्तर मंगलबार बढेपछि त्यहाा खतराको संकेत रातो बत्ती बालिएको छ । १० दिन देखिको लागातारको बर्षाका कारण आएको बाढीले नदीमा पानीको बहाव अहिलेसम्म यो बर्षकै उच्च रेकर्ड भएको छ ।

सोमबार रातिदेखि नै कोसीको जलस्तर बृद्धि भइरहेको छ । मंगलबार बेलुका ५ बजे कोसीमा पनीको बहाब प्रति सेकेन्ड २ लाख ७७ हजार ४ सय १० पुगेको छ । कोसी ब्यारेजका ५६ मध्ये ३७ ढोका खोलेर पानीलाई निकास दिइएको छ ।

कोसी ब्यारेज निर्माण ताका ९ लाख ५० हजार घनफिट पानी नियन्त्रण गर्ने क्षमता भएपनि ब्यारेजको संरचना ५० बर्ष पुरानो हुनु र बालुवाले नदीको सतह उकासेका कारण अहिले ब्यारेजले आधामात्र पानी नियन्त्रण गर्न सक्ने प्राविधिकले बताएका छन् ।   प्रमुख जिल्ला अधिकारी मोहनबहादुर चापागाईका अनुसार चतरामा नदीको जलस्तरमा केही कमी देखिएकाले मंगलबार राति सम्ममा कोसीको पानीको निरन्तर बहावमा केही कमी आउने बताए ।

जलस्तर बढेपनि ब्यारेजले पानी नियन्त्रण गर्न सक्ने अवस्थामा रहेकाले स्थानीयलाई नआत्तिन उनले आग्रह गरेका छन् ।

प्रकाशित: श्रावण ११, २०७३